Plantun de Prouvènço

Pèr coumpara dos planto d'encò nostre

Lepidium virginicum & Ononis spinosa subsp. antiquorum

Lepidium virginicum

Brassicaceae Cruciferae

Nom en français : Passerage de Virginie.

Descripcioun :
Lou granitort-de-Virginìo es uno planto raro au nostre que trachis en ribo de ribiero e que se pòu trouba pèr aqui dins lis escoumbre. A un port proun ramifica coume lis àutri granitort. Poudèn vèire dos meno de fueio, li basalo mai largo e li de la cambo denticulado. Se destrìo de la meno proche Lepidium densiflorum que si petalo soun mai long (1,5 à 2 mm en liogo de < 1mm) e pu grand que li sepalo (fotò) ; en mai d'acò se vèi, emé uno bono lùpi, de péu dessubre. Li siliculo soun quàsi roundo.

Usanço :
Es uno marrido erbo is Americo qu'èi manjadisso en ensalado o cuecho. Li grano podon servi à la plaço dóu pebre.

Port : Erbo
Taio : 20 à 50 cm
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Lepidium
Famiho : Brassicaceae
Famiho classico : Cruciferae

Coulour de la flour : Blanco
Petalo : 4
Ø (o loungour) flour : Pancaro entresigna
Flourido : Printèms - Estiéu

Sòu : Ca
Autour basso e auto : Pancaro entresigna
Aparado : Noun

Liò : Ribiero - Escoumbre e proche dis oustau - Camin
Estànci : Mesoumediterran à Mountagnard
Couroulougi : Pancaro entresigna
Ref. sc. : Lepidium virginicum L., 1753

Estanco-biòu

Ononis spinosa subsp. antiquorum

Fabaceae Leguminosae

Àutri noum : Tanco-biòu, Restanco-biòu, Avagoun, Ajagoun, Lènte.

Noms en français : Bugrane épineuse, Bugrane des anciens.

Descripcioun :
Aquesto planto pulèu bèn couneigudo, trachis dins la garrigo, tepiero seco e ermas. Dins li champ, emé sa forto racino fasié tanca l'arraire adounc li biòu, d'ounte lou noum; la subsp. presentado eici, dóu miejour de Prouvènço, èi di proun espinouso.

Usanço :
L'estanco-biòu èi couneigu desempièi li gre (Galien) pèr faire parti li graviho dóu ren ; defèt, la racino èi proun diuretico (mai sènt proun marrit). La planto èi vertuouso tambèn contro lou ràumi de pèu (eczema) bonodi si prouprieta anti-enflamativo. Èi peréu anti-bateriano (gagarisme pèr lou mau de gorjo), lucho contro li champignoun e mai enca.